«Қызыл аймаққа» ерекше назар аударуды қажет ететін жағдайлар бойынша шақыртулар жатады. Олардың арасында созылмалы обструктивті өкпе ауруы және жүрек жеткіліксіздігі диагноздарымен диспансерлік есепте тұрған 84 жастағы қала тұрғыны да болды. Пациентте созылмалы ауруларының асқынуы байқалған. Медицина қызметкерлері электрокардиография жүргізіп, қажетті дәрі-дәрмектік көмек көрсетті. Нәтижесінде науқастың жағдайы тұрақтанды.

Жедел медициналық жәрдем фельдшері Саят Қыстаубаевтың айтуынша, шұғыл жағдайларда алғашқы минуттар көбіне шешуші рөл атқарады.

«Жол-көлік оқиғалары салдарынан болатын жарақаттар, күйік, құлау, сондай-ақ жүрек-қан тамырлары аурулары денсаулыққа ауыр зардаптар әкелуі мүмкін. Сондықтан дер кезінде көрсетілген алғашқы медициналық көмектің маңызы зор. Әрбір шақырту – адамның өмірі мен денсаулығы үшін үлкен жауапкершілік», – деді фельдшер.

Бүгінде өңірде 70 жедел медициналық жәрдем бригадасы жұмыс істейді. Станцияның аға дәрігері Ляззат Медетованың айтуынша, медициналық ұйым барлық жеделдік санаттары бойынша шақыртуларды қабылдайды.

Егер бұған дейін станция 1, 2 және 3-санаттағы шақыртуларға қызмет көрсетсе, қазіргі таңда оның жауапкершілік аймағына 4-санаттағы шақыртулар да енгізілді. Оларға өмірге тікелей қауіп төндірмейтін, алайда медициналық араласуды қажет ететін жіті аурулар мен созылмалы аурулардың асқынуы жатады.

«Тәулік бойы 2 мыңнан астам өтініш қабылдаймыз, оның шамамен 600-і балаларға қатысты. Орта есеппен тәулігіне бригадалар 1 700-ге жуық шақыртуға шығады, олардың шамамен 400 жағдайында пациенттер медициналық тексеруден кейін стационарға жатқызылады. Қызметке түсетін жүктеменің ең жоғары кезеңі – күннің екінші жартысы», – деді Ляззат Медетова.

Қор филиалының бас сарапшысы Айгүл Аханованың айтуынша, 2026 жылғы 1 қаңтардан бастап Қазақстанда медициналық көмектің бірыңғай базалық пакеті кезең-кезеңімен енгізілуде. Ол тегін медициналық көмектің кепілдік берілген көлемі (ТМККК) мен міндетті әлеуметтік медициналық сақтандыру (МӘМС) аясында медициналық қызметтерді ажыратуды көздейді.

«Жедел және шұғыл медициналық көмек азаматтарға МӘМС жүйесіндегі сақтандырылған мәртебесіне қарамастан қолжетімді болып қала береді. Бұл адам өмірі мен денсаулығына қауіп төндіретін жағдайларда қажетті медициналық көмекті қамтамасыз ету үшін аса маңызды. Медициналық көмек уақтылы әрі әрбір тұрғын үшін қолжетімді болуы тиіс», – деп атап өтті Қор филиалының маманы.

Жедел медициналық жәрдем қызметтерін қаржыландыру Әлеуметтік медициналық сақтандыру қоры тарапынан қолданыстағы нормативтік құжаттарға сәйкес жүзеге асырылады.

2026 жылға арналған сатып алу жоспарында Қызылорда облысында ТМККК аясында жедел және шұғыл медициналық көмек көрсетуге 6 млрд 814 млн теңге қарастырылған.

The post Қызылорда облысында жедел медициналық жәрдем қызметі кеңейтілуде first appeared on Baqyt Web-Dev.

Іс-шараға құқық қорғау және мемлекеттік органдардың өкілдері, жергілікті атқарушы, сонымен қатар, жеке нотариустар, сот орындаушылар, заңгерлер мен адвокаттардан құралған 50-ге жуық кеңесші маман қатысты.

Шара барысында Сыбайлас жемқорлыққа қарсы қызметтің Қызылорда облысы бойынша департаментінің басшысы Қ.Ахметқалиев мұндай іс-шараларды өткізу азаматтардың құқықтық санасын дамытуға мемлекеттік органдарға деген сенімді нығайтуға, сондай-ақ қоғамда жемқорлыққа төзбеушілік мәдениетін дамытуға ықпал ететінін атап өтті.

Шара барысында мамандар 500-ден астам азаматқа кеңес берді.

Сарапшылар неке-отбасы, мұрагерлік, тұрғын үй, еңбек, азаматтық құқық, сыбайлас жемқорлыққа мүлдем төзбеушілік мәдениетін қалыптастыру, сот шешімдерін орындау, денсаулыққа келтірілген зиянды өтеу, несие, жол құрылыстары, қылмыстық және әкімшілік құқық бұзушылық және тағы басқа салаларға қатысты көптеген сұрақтарға жауап берді.

Акция алдағы уақытта да жалғасын табатын болады.

Сыбайлас жемқорлық фактілеріне тап болған жағдайда ҚР Сыбайлас жемқорлыққа қарсы іс-қимыл агенттігінің 1424 call орталығына немесе Департаменттің 8 (7242) 230690 кезекші телефонына қоңырау шалуға болады.

The post Қызылордада жыл сайынғы жалпыреспубликалық «Халық заңгері» акциясы өтті first appeared on Baqyt Web-Dev.

Салтанатты шараға аудан әкімінің орынбасары Н. Бохаев қатысып: «Сіздерді 1 маусым – Халықаралық балаларды қорғау күнімен шын жүректен құттықтаймын! Міне, тағы бір оқу жылы аяқталып, асыға күткен жайдары жаз мезгілі де келіп жетті. Жадыраған жазғы демалыс – барлық балалардың сағына күтетін айрықша сәті. Жазғы демалыстарыңыздың әрбір күнінің естен кетпестей қызықты сәттерге толы болуына тілектеспін. Тынығу лагерінде жаңа достар тауып, ауызбіршілік пен ынтымақтың ұйытқысы бола біліңіздер. Дендерің сау, оқуда озат болыңыздыр!», – деп жылы лебізін жеткізді.

Сонымен бірге, аудандық аудандық мәслихат төрағасы Б. Төреахметов пен аудандық білім бөлімінің басшысы С. Жанназарова қатысып, балалардың қызықты демалыс өткізуіне тілектестік білдірді.

Салтанатты кеште орталық тәрбиеленушілері өз өнерлерін ортаға салып, мыңбұрылған бишілер мен жезтаңдай әншілер көрермендер көзайымына айналды.

Шарада лагердің алғашқы легіне келген тынығушылар кешкілік алау отын тұтандырып, естеліктерімен бөлісті. Мерекенің соңы әсерлі от шашумен аяқталды.

Атап өтейік, «Қамбаш» жазғы тынығу лагері биылғы жылы 7 ауысым бойынша 1000-нан астам баланы жазғы демалыспен қамтиды. Ал бүгінгі тынығу лагерінің алғашқы ауысымына 130 бала қабылданды.

The post «Қамбаш» жазғы тынығу лагерінің ашылу салтанаты өтті first appeared on Baqyt Web-Dev.

Бұрын құжат рәсімдеу үшін ұзын-сонар кезекте тұру қалыпты жағдай болса, қазір eGov порталы арқылы небәрі бірнеше минут ішінде қызмет алуға болады. Смартфон арқылы анықтама алу, биометриялық сәйкестендіру, QR-қолтаңба сияқты технологиялар процестерді оңтайландырып, қауіпсіздікті күшейтуде. Бұл әсіресе ірі қалаларда өз тиімділігін көрсетіп отыр.

Алайда, цифрландыру тек мегаполистердің артықшылығы болып қалмауы тиіс. Ауыл-аймақтарда да интернет инфрақұрылымын дамыту, цифрлық сауаттылықты арттыру – маңызды қадам. Себебі цифрлық мемлекет – баршаға тең мүмкіндіктер беретін мемлекет. Цифрландырудың басты мақсаты – азаматтардың өмірін жеңілдетіп, кез келген қызметке жылдам әрі ыңғайлы қол жеткізуін қамтамасыз ету. Ендеше, осы өзгерістердің игілігін барша қазақстандықтар көруі үшін жаңа мүмкіндіктерді белсенді түрде пайдаланайық!

Нұрлан ҚҰЛМЫРЗАЕВ,

Қорқыт ата атындағы Қызылорда университетінің 

Жасанды интеллект институтының директоры

The post Цифрландыру – мемлекеттік қызметтерді жаңа деңгейге көтеретін қуатты құрал first appeared on Baqyt Web-Dev.

Депутат мәслихат туралы заңнаманың жетілмегендігі және оның мәслихат депутаттарының өкілеттігін шектейтіні, әсіресе бюджет және ресурстарды бөлу мәселесінде негізгі кедергі болатыны туралы айтты. Мәслихаттарды қаржыландыру да ұдайы жеткіліксіз болып келеді, бұл олардың жұмысына және әлеуметтік маңызы бар жобаларды іске асыру мүмкіндігіне әсер етеді.

«Мәслихат депутаттарының алдына халық мүддесінің білдіру жүктелген, бірақ сонымен бірге олардың заңнамалық және әкімшілік деңгейде мүмкіндіктері айтарлықтай шектелген. Мәслихаттардың шешім қабылдау өкілеттігі, әсіресе қаржы және бюджет бағытында жиі шектеледі. Бұл олардың жергілікті қажеттілік пен қоғамдық сұраныстарға тиімді жауап беру қабілетіне кері әсер етеді. Жергілікті өзін өзі басқару дербес десек те мәслихаттар атқарушы билікке аса тәуелді. Тұрғындар жергілікті басқару тетіктерінің жоқтығынан мәслихаттардың тиімділігі мен пәрменділігі төмендігін айтады. Мәслихат аппаратының қаржыландыруы толыққанды шешілмегендіктен оның функциялары талапқа сай орындалмай отыр», – деді Бибигүл Жексенбай.

Депутат сонымен қатар шалғай аудандарды кадрмен қамтамасыз ету мәселесін атап өтті. Азаматтар көбінесе мәслихаттың қызметі туралы біле бермейді және шешім қабылдаудан сырт қалады, бұл жұмыстың тиімділігін төмендетеді. Мұның бәрі жалпы мәслихат жүйесін, олардың рөлі мен жергілікті қоғамдастықтың дамуына ықпалын арттыру үшін реформалау қажеттігін көрсетеді.

«Мәслихаттардың жергілікті істерді басқаруға белсенді қатысуға мүмкіндік беретін қосымша өкілеттіктер қарастыру керек. Атқарушы және өкілді билік тармақтары арасындағы функциялардың қайталануын болдырмау үшін мәслихаттардың, әкімдіктердің және қоғамдық кеңестердің міндеттерін нақты айқындау керек. Депутаттардың халық алдындағы есеп беруін депутаттың сайлау алды бағдарламасымен байланыстыра отырып бір жүйеге келтіру керек», – деді Бибигүл Жексенбай.

The post Бибигүл Жексенбай мәслихаттардың тиімділігін арттыру шараларын ұсынды first appeared on Baqyt Web-Dev.

Жоғарғы соттың жұмысын жеңілдету мақсатында келер жылдан бастап кассациялық сот жұмысын бастамақ. Бүгін Өңірлік коммуникациялар қызметінің ақпарат алаңында жауапты сала мамандары келіп судьялардың ІХ съезінде талқыланған мәселелерді айтты.

– Мемлекет басшысының қатысуымен өткен жиынның ерекшелігі – географиясының ауқымы мен биліктің үш тармағының да бірдей қатысуында. Себебі, атқарушы, заң шығарушы және сот билігі бірге қатысқан жиын болды. Ел Президенті сот жүйесіндегі реформаларға, сот жұмысына оң бағасын берді. Әсіресе, биылғы жылы сот отырыстары өте ұтымды ойластырылып, адамдардың құқықтық сауаттылығын арттыра түскенін жеткізді. Жаңа кассациялық соттардың сот төрелігін жүргізудегі тиімділігін, сот практикасының бірыңғай болуын қамтамасыз ететінін баса айтты. Жалпы, бұл жиыннан алған әсерім мол. Себебі, 19 жылдық судьялық еңбек жолымда осындай алқалы жиынға қатысу мүмкіндігі алғаш рет бұйырды, – деді Қызылорда облыстық сотының судьясы Шолпан Маликова.

– Қазақстанның соты тәуелсіздік жылдарында үлкен даму белестерінен өтті. Осы жылдар ішінде үздіксіз жүзеге асырылған реформалар саланың аяғынан тік тұрып, өзіндік бет-бейнесін қалыптастыруына, жұмысын жүйелеуіне ықпал етті. Соттың беделін биіктетіп, судьялар тәуелсіздігін нығайтуда жыл сайынғы Президент Жолдаулары мен әр төрт жыл сайын ұйымдастырылатын республика судьялары съезінің орны зор. Бүгінде соттағы жаңашылдықтардың күретамырына айналған «Судьялар одағы» республикалық қоғамдық бірлестігі де бастауын осы съезден алған болатын. Бұл бірлестік 1996 жылғы алғашқы съезде өз жұмысын бастады. Міне содан бері Судьялар одағы сот жүйесінде іске асырылып жатқан іргелі жобалар мен жаңашылдықтардың, заңнамаларға енгізілген өзгерістердің, қоғамдағы айтулы бастамалардың жаршысы болып келеді, – деді Қызылорда облысының мамандандырылған ауданаралық экономикалық сотының төрағасы, Судьялар одағының Қызылорда облысы бойынша филиалының төрағасы Бақытбек Елшібеков.

– Бүгінде мемлекеттік қызметшілер мен азаматтық қызметшілердің қызмет әдебі кодексі бар. Әдептілік қағидаттары жинақталған кодекс судьялар қауымының да басты бағдар етер құжатының бірі. Бұл кодекс судьялардың кәсіби және қызметтен тыс өміріндегі мінез-құлықтарының этикалық ережелерін анықтауымен бағалы. 1996 жылы республика судьяларының І съезінде қабылданған Әдеп кодексіне бірнеше жаңғыртулар жасалып, бүгінгі күнге дейін судьялардың қызметтегі және қызметтен тыс кездегі әдебінің басты талаптарын белгілеген болатын. Міне, осы жылдар бойы судьялардың қорғаны болған Әдеп кодексін заман талабына сай қайта дайындау қажеттілігі туындап отыр. Бұл өзгеріс бүгінгідей жаңа технология жетістіктері жаппай қолданысқа енгізіліп, ақпараттар тасқынын сүзгіден өткізу мүмкіндігі төмен кезеңде аса өзекті болып отыр. Кодекс көпшіліктің көкейіндегі талап пен тілекке толық сәйкес келуі үшін судьялардан арнайы жұмыс тобы құрылған еді. Осы жұмыс тобының құрамында маңызды құжаттың дайындалуына атсалысу мен үшін үлкен мәртебе. Жалпы Әдеп кодексін дайындау ісінен республика судьяларының ешқайсысы шет қалған жоқ. Алдымен жергілікті жерлердегі судьялар кодекске қатысты өз пікір-ұсыныстарын білдіріп, сол бойынша құжаттың негізі жасалды – деді Қызылорда облысының мамандандырылған ауданаралық әкімшілік сотының төрағасы Гүлжан Мырзатаева.

The post Әдеп кодексі – судьялардың басты тірегі first appeared on Baqyt Web-Dev.

«Бала барыс-2024» турнирінің дәстүрлі сипат алуы қазақ күресінің келешегі кемел, болашағы жарқын боларының бір дәлелі.

Облыс аумағынан 32 жасөспірім қатысқан жас балуандар додасы «Евразия» спорт кешенінде өтті. 

Тартысты бәсекенің нәтижесінде қызылордалық «Балмолдин» лақап атын иеленген Исламбек Балмолдаев ІV орын 25 мың теңге иемденсе, ІІІ орын 50 мың теңге және «Қола белбеу» «Көкбөрі» лақап атын иеленген Жалағаш ауданынан Ерсұлтан Сұлтанбековке бұйырды. «Ошақты» Жалағаш ауданынан Әлинұр Сәрсенбай ІІ орын 100 мың теңге мен «Күміс белбеуді» қанағат тұтса, І орын 200 мың теңге және «Алтын белбеуді» қармақшылық «Семетей» Әлихан Әлиасқаров жеңіп алып, арнайы жасалған алтын «Тайтұяқты» қанжығасына байлады. Осылайша үш дүркін «Бала барыс» атағын иемденді.

The post Жас балуандар боз кілемде белдесті first appeared on Baqyt Web-Dev.

Ағартушылықтың арнасын ашқан

Әріден бастасақ, қазақ халқы XIX ғасырдың соңы мен XX ғасырдың басында жаңа тарихи кезеңдерге қадам басты. Жұрттың ағартушылыққа мұқтаж кезеңі. Соның әсерінен алғашқы қазақ кітаптары, ұлттық баспасөз құралдары, жаңаша мектептер пайда болып, ұлттық қозғалыстар қалыптасты. Ресей түркілері арасындағы қоғамдық-cаяси және ағартушылық қозғалыс – «жәдитизмнен» қазақ қоғамы да қағыс қалмады. Қазақтар арасында да жәдиттік бағыттағы ағартушылық қозғалыс барынша өркендеп, Алаш идеясы өрістеді. Ұлтты ең алдымен ағартушылық һәм іскерлік жолға салу басты бағыт болды. Халықтың сана сезімі мен ұлттық мәдениетті көтере отырып теңдік пен еркіндікке жетуге тырысты. Бұл жолда қазақтың тұңғыш басылымдары басты рөлді атқаруы тиіс еді.

«Қазақ» газетінің тарихына қысқаша тоқталсақ, Әлихан Бөкейхан, Ахмет Байтұрсынұлы, Райымжан Мәрсекұлы бастаған алдыңғы қатарлы қазақ оқығандары жалпыхалықтық газет ашумен 1905 жылдан айналыса бастады. Алдымен олар «18 ақпан жарлығы» шығысымен өздерінің саяси талаптарын әйгілі «Қарқаралы петициясына» тізіп жазып, осы жарлыққа қол қойған орыс патшасының атына поштамен жөнелтеді.

Дәл осы петицияның 3-тарауында: «Қазақ халқының қазіргі мұқтажын айқындау үшін қазақ тілінде газеттер басып шығару қажет, ол үшін бастапқы цензурасыз баспахана ашуға және газет басуға рұқсат сұрау емес, құлақтандыру тәртібін орнату керек болады» деп жазылған еді.

Сол жылғы желтоқсан айының басында ақпарат көзі ретінде Санкт-Петербургтің «Новая жизнь» газетін сілтеп көрсеткен семейлік «Семипалатинский листокъ» «17 қазан манифесі мен одан кейінгі тұста Ә.Бөкейхановтың қазақ тілінде газет басып шығару үшін қырға кеткенін» хабарлады. Ал қараша айында Бөкейхан Ресейдің «жергілікті және қалалық қайраткерлерінің» Мәскеудегі съезінде қазақтың сөз бостандығына зәру екенін айтып, сөз сөйледі. Ол: «Ана тілін еркін қолдану қазақтардың таяу арадағы мұқтажы, сөз бостандығы әсіресе алдағы сайлау науқанына қажет» деп мәлімдеді. Бұл мақсат арқылы 1913 жылдың ақпанында іске асты. Осылайша қазақ қоғамын саяси һәм мәдени бағытта ағартушылыққа жол ашылды. 

Көзқарас қалыптасқан кезең

Әрине, «Қазақ» газетінен бұрын да басылымдар болғаны рас. Қазақ баспасөзі тарихы XIX ғасырдың екінші жартысында Ташкентте шыққан «Түркістан уалаяты» газеті (1870-1882) мен Омбыдан шығып тұрған «Дала уалаяты» газетінен (1888-1902) бастау алады. Бірақ неге «Қазақты» алдыңғы орынға шығарамыз? Өйткені жоғарыда аталған екі газет те – патша өкіметінің жергілікті басқару органдары арқылы шығып тұрған басылым еді. Сондықтан да мұнда көбіне үкімет қаулылары жергілікті ұлт тілдеріне аударылып жарияланып тұрды. Газеттің кей сандарында өлке тарихына қатысты құнды жазбалар да кездесті. Алайда елдің көзін ашуға септескен жоқ.

1905 жылғы бірінші орыс революциясынан соң ұлттық тілде мектеп ашуға рұқсат беріліп, ұлттық баспасөз шығаруға мүмкіндік туды. Бұл уақытта Ресей Мемлекеттік думасында қазақ депутаттары да өз пікірлерін айта бастаған. Ұлттық баспасөзге деген қажеттілік туындады. Алғашқылардың бірі болып Торғай қазақтары 1907 жылдың басында Троицк қаласында Хайым Шомылов Сасновский, Жетпісбай Андреев, Ешмұхамед Имамбаев басшылығымен «Қазақ газеті» атты газет шығып, бірнеше саны басылған соң тоқтайды. Газетті шығарушылар мен газеттің өзі туралы татар басылымдары ұнамды пікір айтпайды. Ұстанған бағыты мен тұтынған жолының дұрыс еместігін газет бетінде жарияланған жазбалар арқылы сынап жазады. Көп ұзамай, 1907 жылы наурызда Петербург қаласында Ғабдрашид Ибраһимов пен дума депутаты Шәймерден Қосшығұлов жетекшілігімен «Серке» атты 15 күнде бір шығатын газет басылады. Бірнеше саны шыққан соң «Серке» газеті һәм онымен қанаттас татардың «Улфат» газеті де цензурамен жабылып, таратылған сандары полиция тарапынан тәркіленеді. Тек 1911 жылы шыққан қазақтың тұңғыш журналы – «Айқап» пен Ордада шыққан «Қазақстан» газетінің ғұмыры сәл ұзақтау болды. Алайда бәрі де «Қазақ» газеті секілді мақсатына жете алмады.

«Қазақ» газетінің қолдан қолға өтіп, ауылдан ауылға барып, тозып жетіп жыртылғанша оқылғаны жайлы деректер өте көп. Оны сол заманда Дала және Түркістан уалаяттарына немесе 9 облыс және 1 губернияға бөлінген Қазақстанның түкпір-түкпіріндегі жұрт жаздырып алды. Енді «Қазақтың» нақты мақсаты не?» десеңіз, бірнеше себептерді атай аламыз. Қазақтардың 1907 жылғы 3 маусым заңымен жойылған сайлау және сайлану құқығын қалпына келтіру; Келімсектерді қоныстандыру арқылы отарлау саясатына қарсы тұру және тәркіленген жерлерді қазақтарға қайтарып алып, меншікті жері ретінде заңдастыру; «Ауыл мектептеріне қазақ әліппесін енгізу, осы мектептерде балаларды ана тілінде оқыту» және «Болыс кеңселері мен халық соттарында ісқағаздарын қазақ тілінде жүргізу» арқылы астыртын және ашық орыстандыру саясатына төтеп беру деп жалғаса береді. Бірақ ең басты екеуі – дала өлкесіне заң жүзінде жергілікті басқару тетігін енгізу һәм дамыту арқылы жаңа қазақ мемлекетінің негізін салуды бастау және ұлттың дәстүрлі негізін сақтай отырып, батыс мәдениетіне ілесу еді. Оны Әлихан Бөкейхан өзінің «Қазақтар» очеркінде атап өткен. Арада ғасырдан да ұзақ уақыт өтті, ал «Қазақ» газеті осы мақсаттарының бәрін жүзеге асыра алды деп санауға болады.

Бүгінде елімізде баспасөз кеңістігі ашық, ақпарат ағыны күшті. Бір Қызылорда облысының өзінде 148 бұқаралық ақпарат құралдары жұмыс істеуде. Оның ішінде 119 баспа БАҚ, 26 интернет-сайттар мен ақпараттық агенттіктер, 3 телеарна бар.

Мадияр Төлеу,

«Сыр бойы»

The post «Қазақ» һәм қоғам first appeared on Baqyt Web-Dev.

Турнир мемлекеттік мереке мен еңбек ардагері Жақсылық Зимановты еске алуға арналды. Қалалық мәдениет және спорт бөлімінің қолдауымен өткен шараға «Аквалайн» ЖШС демеушілік көрсетті. Жарысқа 260 жас спортшы қатысты.

Турнир қорытындысы бойынша Байқоңыр қаласы 50 медальмен 1-орынды, «Сарбаз» клубы 13 медальмен 2-орынды, №5 спорт мектебі 11 медальмен 3-орынды иеленді.

Төрешілер шешімімен «Ката бағдарламасының ҮЗДІГІ» болып катист Ким Ева марапатталды. Сәбит Еңлік «Кумитэ бағдарламасының ҮЗДІГІ» атанды.

Командалық кумитэ сайысы бойынша ұлдар арасында 1-орынды Қажымұқан спорт клубы жеңіп алса, қыздар арасында №2 спорт мектебі жеңіс тұғырына көтерілді.

Турнирге қатысқан командалардың көрсеткіштері:
1. Сыр болашағы – 2 алтын, 1 қола. 
2. Қажымұқан спорт клубы – 3 алтын, 2 күміс, 4 қола. 
3. №1 спорт школа – 3 алтын, 7 күміс, 7 қола.   
4. Мансұр спорт клубы – 2 алтын, 3 қола. 
5. ОРМБЖМ – 1 алтын, 2 күміс, 5 қола.  
6. Локомотив спорт клубы – 3 алтын, 5 күміс, 9 қола.  
7. Сарбаз спорт клубы – 4 алтын, 4 күміс, 5 қола. 
8. №2 спорт мектебі – 3 алтын. 
9. №5 спорт мектебі – 4 алтын, 1 күміс, 6 қола. 
10. Байқоңыр қаласы – 11алтын,12 күміс, 27 қола. 
11. Қармақшы – 1 алтын, 2 күміс, 5 қола.

Фото: каратэ—до федерациясы

Фото: каратэ—до федерациясы

The post Қызылордада үздік каратэшілер анықталды first appeared on Baqyt Web-Dev.

The post Imagify – Optimize Images & Convert WebP | Compress Images Easily first appeared on Baqyt Web-Dev.